На TikTok, креаторката @radiatewithangie демонстрира како длабоко вдишува додека го изведува butterfly tapping, објаснувајќи дека тоа ѝ помага да се почувствува смирено и центрирано. Таа го користи секогаш кога е анксиозна или емоционално дисрегулирана.
Во друго видео, креаторката @psychwithann објаснува дека butterfly tapping е толку ефективен бидејќи со нежното тапкање го активира парасимпатичкиот нервен систем. Тоа е едноставен, пријатен начин да се ослободите од бес, анксиозност, преоптовареност и други негативни емоции што создаваат внатрешна напнатост.
Butterfly Tapping, TikTok тренд со научна основа
Овој вид тапкање е техника на заземјување во која ги прекрстувате рацете преку градите, како да се прегрнувате себеси, а потоа наизменично тапкате со прстите. Делува така што повторно го поврзува телото и умот, нешто што често се нарушува во моменти на анксиозност, кога загрижувачките мисли го преземаат фокусот. Со тапкањето, вниманието се враќа во телото и создава чувство на присутност.
Техниката користи билатерална стимулација, бидејќи се тапка од двете страни на телото. Ова наизменично движење испраќа предвидлива, тактилна и стабилна сензација до мозокот, која го забавува дишењето и го активира парасимпатичкиот нервен систем. Токму тој систем е одговорен за физичкото и менталното смирување. Со секое тапкање, телото добива порака дека нема опасност и дека сте безбедни.
Извор: The Vault Stock
Кога да практикувате Butterfly Tapping
Без разлика дали се соочувате со општа анксиозност, сензорна престимулација или едноставно се чувствувате нервозно и преоптоварено, тапкањето како пеперутка може да помогне да ја вратите рамнотежата. Ритмичкото движење ја прекинува спиралата на мисли, го насочува вниманието кон сегашниот момент и го регулира нервниот систем. Најдобро од сè, можете да го практикувате секогаш кога ќе почувствувате напнатост. Техниката е едноставна, практична и изненадувачки ефикасна.
Иако не ја заменува терапијата или другите форми на третман, butterfly tapping е одлична алатка за секојдневно намалување на стресот и грижа за себе „во движење“. Можете да го практикувате пред ситуации што ви создаваат трема како презентации, интервјуа или важни состаноци, а корисно е и по тие настани, за дополнително смирување. Многумина со социјална анксиозност велат дека ова движење им делува како да притиснале „копче за ресетирање“ на телото.
Тапкањето како пеперутка е и одлична алтернатива за оние на кои им е тешко да медитираат во тишина. Активното, ритмичко движење му дава на мозокот фокусна точка додека постепено се опуштате и се враќате во своето тело.
Како се прави Butterfly Tapping
За да се опуштите, можете да го практикувате тапкањето како пеперутка со едноставна, ритмична секвенца. Прекрстете ги рацете преку градите како нежно да се прегрнувате себеси и потпрете ги дланките на градите, спојувајќи ги палците за да формирате „крила“ на пеперутка. Потоа започнете да тапкате, прво со десната, па со левата рака, наизменично и ритмично, отприлика едно тапкање во секунда. Дишете полека, со подолг издишок отколку вдишок, и дозволете им на очите да бидат полузатворени или целосно затворени.
Ако сакате, додека тапкате можете да додадете смирувачка афирмација како „безбедна сум“ или „имам контрола“. Продолжете неколку минути, сè додека не почувствувате опуштање и стабилизирање на внатрешната состојба. Оваа мала, но моќна техника можете да ја користите секојпат кога ќе почувствувате напнатост или потреба од брзо смирување.
А за дополнителна грижа за себе и мотивација во студените месеци, вреди да го испробате и трендот „Winter Arc“ на TikTok 90-дневен зимски предизвик кој ветува целосна мини-трансформација на навиките и благосостојбата.
Извор: wannabemagazine.com
